اي ڪاش اِهو تون ڄاڻين ها
آزاد ھوا ڇا ٿيندي آ!
اي ڪاش اِهو تون ڄاڻين ها
پرواھ بنا پَرَ ڪيئن هوندا
آزاد فضا ڇا ٿيندي آ!

اي ڪاش اِهو تو ڳائين ها
ڪلهہ رات ڀڳت سنگهہ ڦاسيءَ تي
جو گيت اڌورو ڳاتو ھو!
اي ڪاش اُهو تو پائين ها
جو ھار هوائن ۾ لڏندي
ڪلهہ تانتيا ٽوپِي پاتو ھو!

تاريخ جي خوني گلين مان
ھر وقت صدا ڪا ايندي آ
ھر وقت لهوءَ جي لاڙن ڏي
ڪا توکي ڇِڪّ ڇڪيندي آ

ڄڻ او ڊائر جي ڪا گولي
اڄ تائين توکي تاڙي ٿِي
۽ تنهنجا تُنهنجي مقتل ڏي
ڄڻ پير اچانڪ لاڙي ٿِي،
تاريخ بکايل چيتي جيئن
چؤواٽي تي چنگهاڙي ٿِي.

اي ڪاش اِهو تون ڄاڻين ها
ڇا تن جي قيمت ٿيندي آ،
جنھن آزاديءَ جا گيت چيَئه
سا آزادي ڪِٿ نيندي آ!
اي ڪاش اِهو تون ڄاڻين ها
سا آزادي ڪيئن اينديِ آ!