تنھنجي بدن جي خوشبو ۽ شام جا نظارا،
ڄڻ مئڪشن لئہ آھن، ڪنھن جام جا نظارا!

اکڙيون جهڪائي آڇيئي، ديوانگي صدين جي،
ڪيڏا حسين آھن، ان مام جا نظارا!

يوسف کي ٿا کپائن، ڪوئي نہ آھ گاھڪ،
ڪيڏا ڀوائتا ھن، نيلام جا نظارا

سورج لھي ويو آ، ڏيئو نٿو ڪو ٻاري،
ڪھڙا ڀلا ٻيو ٿيندا ڪُھرام جا نظارا

ڪنھن جو ٻچو جليو ٿي، ڏاھپ ھو ڏوھ جنھن جو،
ھن ملڪ ۾ عجب ھن، الزام جا نظارا!

ھو سمنڊ جو ڪنارو ۽ وار کليل تنھنجا،
مون لئہ اھي ئي آھن، آرام جا نظارا!