ڏينهَنَ کان پو پاڻ ملياسين روئي پياسين،
حال اندر جا پَئي اورياسين روئي پياسين،

جڳ جي دل ۾ دل وانگي ئي ڌڙڪياسين پَئي،
تنهنجي دل تان جيئن لٿاسين روئي پياسين.

گهري ڪاري ڀونئر جدائي هئي جوڀن جي،
اکڙين آڏو انڌ ٿياسين روئي پياسين.

پنھنجي وچ ۾ اڄ بہ وڇوٽي ايڏي هئي جو،
پنھنجا پنھنجا لُڙڪ اُگهياسين روئي پياسين.

ڌار ٿياسين ۽ ھڪ ٻئي جا جيئرا لاشا،
دل ئي دل ۾ دفناياسين روئي پياسين.

ضدي آھين پُٽ جو نالو سارنگ رَکيَئي،
پنھنجا واعدا ياد ڪياسين روئي پياسين.