سنڌو ماتا،
سنڌو ماتا!

تَڙ تي رت جا ڏيئا ٻاري،
توکي سجدو روز ڪَيان مان،
توتي پنھنجو ساھ ڏِيان مان،
توسان جُڳ جُڳ منھنجا ناتا،
سنڌو ماتا!

ڊوڙي آيُون توکي ساري،
ڪُنڍيُون، گائُون پيئڻ پاڻي،
تون ئي راجا، تون ئي راڻي،
تون ئي مالڪ، تون ئي داتا،
سنڌو ماتا!

تارا سارا توتي واري،
اکيون گهوري آءُ ڏيان مان،
صدقو بابو، ماءُ ڪَيان مان،
ساھ سَمورا تو لئہ آتا،
سنڌو ماتا!

سيني اندر سِڪ کي ساري،
ساھ سُرندا سارا ڇيڙن،
ڳل ڳل ڪيڏا موتي ميڙن،
ڪيڏارا سڀ تو لئہ ڳاتا،
سنڌو ماتا!

ٻوڙي آخر توئي تاري،
مون کي سنڌڙي آندو آھي،
ھاڻي ھي من ماندو ناھي،
ڇولي ڇولي ڀاڪر پاتا،
سنڌو ماتا!