ماڻ جيون جواني ھتي ۽ ھينئر،
جيڪي آھي سو جاني ھتي ۽ ھينئر.

ڪو پتو ناهي ساجن سڀاڻي صحي،
ڪيڏي توڏي ٿي دل تيز تاڻي پئي،
مون تي ڪر مھرباني ھتي ۽ ھينئر.

موت کان پوءِ ماتم نہ مچرائجان،
پاڻ ڪارا لٽا تون نہ پھرائجان،
نينھن جي ڏي نشاني ھتي ۽ ھينئر.

پاڻ کان پوءِ اُڀري نہ اُڀري پرين،
خير گهر خير سان شال گذري پرين،
ھيءَ ذري زندگاني ھتي ۽ ھينئر.

مون مَقامن مَساڻن ۾ ڳولي ڏٺو،
ڌوڙ ئي ڌوڙ ھُئي ڪو بہ سھڻو نہ ھو،
حُسن جي حڪمراني ھتي ۽ ھينئر.

آءُ ھڪ ٻئي کي خوش ٿي کٿوري ھڻون،
سونھن سڪ جي ڪھاڻي بخاري پڙھون،
زندگيءَ جي زباني ھتي ۽ ھينئر.