عشق کي جيئرو ڪيسين رکندين؟ ڪيسين پاڻ کي ماريندين؟
پنھنجي من کي پاڻ وساري ڪيسين ھن کي ساريندين؟

ٽھڪن جون ھوءَ رانديون رھندي ھوندي ويٺي، پنھنجي منھن،
ڪيسين سڏڪا ڀرندين تون ۽ ڪيسين تون اوساريندين؟

گيت الئہ ھوءَ ڪنھن جا چوندي ھوندي ھاڻي راتين جو،
ڪيسين ھن جا نغما چوندين، ڪيسين تون جهُنگاريندين؟

تنھنجي اندر تو جھڙو ئي تنھنجو عاشق رھندو آ،
ڪيسين پاڻ تون روئندين ۽ ڪيسين ھن کي روئاريندين؟

ھنڌ تي اڪثر، خوابن ۾ ھوءَ ڳولهيندي آ شھزادا
ڪيسين ھن لاءِ راتين کي تون پنھنجو جام پياريندين؟

”قيس“ تون محفل ڪونہ ڏسين ٿو ھن کي ٿو بس ياد ڪرين،
ڪيسين ھي سڀ ٻڌندا توکي ڪيسين يارَ پچاريندين؟