ڪجھ شعر لکڻ گھرجن
ڪجھ پيار ڪرڻ گهرجي

ڪو پھر حياتي جي
کيسي مان ڪجي چوري
درياه جي ڪناري تي
ڪا دير وڃي ٿوري
لھرن جون ٻڌي لاتيون
لھرن سان ڪجن باتيون
ڪا ڳالھ اڃي من جي
درياه سان سلڻ گهرجي
ڪجھ پيار ڪرڻ گهرجي
ڪجھ شعر لکڻ گھرجن

ڪو پھر حياتي جو
جهنگلن ۾ وڃي گهمجي
۽ دل جي ٽاري تان
ڪي پل پکين جهڙا
بي چين ھوا وانگر
چنچل اکين جهڙا
پل پل ٿا اڏن جيڪر
پل پل ئي اڏڻ گهرجي
ڪجھ پيار ڪرڻ گهرجي

ڪجھ شعر لکڻ گھرجن
ڪو پھر حياتي جو
صحرا سان وڃي ملجي
واري جي وڇاڻي تي
ڪا رات وڃي رھجي
ڀٽ ڀٽ جي سيني ۾
ڪو راز وڃي رکجي
ڪجھ ميگھ مندون ڏيئي
ڪا پياس وٺڻ گهرجي
ڪجھ پيار ڪرڻ گهرجي
ڪجھ شعر لکڻ گھرجن

ڪو پھر حياتي جو
خود ڏانھن بہ ورڻ گهرجي
پي ڪير رليو مون ۾
مان ڪنھن سان مليو آهيان
ھو ڪير رنو مون ۾
مان ڪنھن سان کليو آھيان
ڪجھ خود کي ڏسڻ گهرجي
ڪجھ خود کان پڇڻ گهرجي
ڪجھ پيار ڪرڻ گهرجي
ڪجھ شعر لکڻ گھرجن