انھي در جي داسي، اڙي دل! اڙي دل!
تون ايڏي اڻاسي، اڙي دل! اڙي دل!

اڃان ڪجهہ نہ ڪجهہ رات تي گهات آھي،
کڻي چنڊ اماسي، اڙي دل! اڙي دل!

نہ ڪو چلولي! تنهنجي چوڙي مڃٺ چٽ،
نہ ڪا سينڌ واسي، اڙي دل! اڙي دل!

ڪڏھن اڀ جو اوھ وسندي نہ گسيو،
تون پيئندي پياسي، اڙي دل! اڙي دل!

هيءَ رات ولهہ ۾ اوهان وار ڇوڙيا،
وسئن ڄڻ وماسي، اڙي دل! اڙي دل!

ھو آيا ۽ وارا نيارا ڪري ويا،
تون اڄ تائين آسي، اڙي دل! اڙي دل!

محبت نہ ٿي ڄڻ تہ ڪا رڃ جي اڃ،
تون ڪنھن جي پياسي، اڙي دل! اڙي دل!