جڏھين ڪنھن بہ بادل، ولھاريون وساريون،
الئہ ڇو اوھان جون اکيون ياد آيون،
جڏھين چنڊ چوڏس ڪيون چلولايون،
الئہ ڇو اوھان جون اکيون ياد آيون.

جڏھين ڪنھن بہ ڪوئل اسر ويل ڳايو،
تڏھين وِلھہ ويتر وڇوڙو وڌايو،
جڏھين ماڪ مُکڙيون ڀنيءَ جون ڀڄايون،
الئہ ڇو اوھان جون اکيون ياد آيون.

جڏھين کيٽ ۾ ٻاجھرين سنگ واريا،
جڏھين چيٽ ۾ ڦول ڄانڀي ڦُلايا،
جڏھين ٿر تي مورن ڪي ٻوليون ٻُرايون،
الئہ ڇو اوھان جون اکيون ياد آيون.

جڏھين تو سان نيڻن جو ناتو ڇِنو ھو،
تڏھين دور آڪاش ڪيڏو رُنو ھو،
جڏھين جيءُ جهورڻ ھي آيون جدايون،
الئہ ڇو اوھان جون اکيون ياد آيون.