آبشارن جا بدن بيھن نہ ٿا،
عورتون اوچائيءَ تان ڪيئن ٿيون ڪرن؟
وقت جا ھٿ پيا پھاڙن کي گھڙن،
ڪارائيءَ جا ڏند ڪاٺن کي ڪٽن،
ريل گاڏيءَ ۾ مسافر پيا وڃن،
آبشارن جا بدن بيھن نہ ٿا،
عورتون اوچائيءَ تان ڪيئن ٿيون ڪرن؟

جسم جو جر ٿو جڏھن ڇاڇولجي،
ڍنڍ ۾ جيئن ٿو مڇيءَ کي ڳولجي،
لھر کي ڄڻ لھر ۾ ٿو ڳولجي،
آبشارن جا بدن بيھن نہ ٿا،
عورتون اوچائيءَ تان ڪيئن ٿيون ڪرن؟

رات کي ماڻهو رجائي ٿو سگھي،
پٽ تي تارا گهرائي ٿو سگھي،
ڪنھن کي ڪنھن کي پر پڌائي ٿو سگھي
آبشارن جا بدن بيھن نٿا!
عورتون اوچائيءَ تان ڪيئن ٿيون ڪرن؟