يادگيرين جا سيلاب ايندا رھيا،
بند اکڙين منجهان بَند ڀَڄندا رھيا،

چند چٿرون ڪيون،
دل جي تنھائي تي،
تنھنجي آڪاش جي،
ھن اڪيلائي تي،
طنز سان روز تارا تڪيندا رھيا،
يادگيرين جا سيلاب ايندا رھيا.

وقت! تنھنجو ھي ورتاءُ،
واجب نہ ھو،
گھايلن تي نئون گھاءُ،
واجب نہ ھو،
وک وک تي وڇوڙا وڍيندا رھيا،
يادگيرين جا سيلاب ايندا رھيا.

نيڻ نينڍون ھيا،
ويڻ وڻندا ھيا،
تنھنجي ڇڙٻن منجهان،
ڦول ڇڻندا رھيا،
ھا! مگر اڄ اھي وقت ويندا رھيا،
يادگيرين جا سيلاب ايندا رھيا.