اسان انقلابي اسان انقلابي،
ٿي مجبور حملا ڪنداسون جوابي.
سَٺاسون سوين سر تي قانون ڪارا،
اچي تنگ، ڪرڻ جنگ، سکي ويا ھي سارا،
ٿيا جڏھن ظالم جا مظلوم مارا،
رھي ڪٿ نہ سگھيا پوءِ رھزن ربابي.

ٻڌي ڇڏ ڪروڙن ٻاٻاڻن جي ٻولي،
ڀلي چاڙھ سوري ڀلي مار گولي،
نہ رھندي ھتي سامراجين جي ٽولي،
آھي ختم ڪرڻي ھي ساري خرابي.

نہ سھندا ھي سانگي ستم سامراجي،
پراڻا فريب ۽ ھي رسمون رواجي،
گھرون ٿا گھرون ٿا صحيح حق سماجي،
نہ گھرجن مھاجر پٺاڻ ۽ پنجابي.

وڏيرو ھي ظالم وڏيرو نہ گهرجي،
ڪامورو ھي ظالم ڪامورو نہ گهرجي،
غلط انتظام ھي سمورو نہ گهرجي،
نہ ھلندي ڪنھن زردار جي ھِت نوابي.

ڪنداسون نہ برداشت بد انتظامي،
اُٿي آڳ ڀڙڪي آ اڄ انتقامي،
حڪومت ڪبي ھت حقيقي عوامي،
ڇڏينداسون ٽوڙي غلط حد حسابي.

سڄو ملڪ پاپين ڪنا پاڪ ٿيندو،
نہ مومل جي طلسم وارو ڪاڪ رھندو،
ھتي ھر بشر ھاڻ بي باڪ ھوندو،
آھي ڪرڻي ظلمت منجهان ماھتابي.
سياھي جي راتين جو چيري تہ سينو،
ٻارڻي لاٽ آھي ڏيئي رت پسينو،
آھي تار مان تارڻو ھي سفينو،
نہ ڪر فڪر ”منشي“ ٿيندي فتحيابي.