رم جهم رم جهم راز پرين جو،
ناچ وندر آ ناز پرين جو!

تڙگھٽ تڙگھٽ طبلي واري،
ساز سرود نہ دنياداري،
تار ۽ ڦوڪ جي ترت تياري،
سونھن سموري ساز پرين جو!

ھٺ ھٺيليون ھرڻيون آھن،
سير مڇيون ڪيئن ترڻيون آھن،
جهڙيون ڪرڻيون ڀرڻيون آھن،
مست قلندر باز پرين جو!

مون تہ ٻڌو ھو من ئي من ۾،
اٺ ئي صديون ھڪڙي ڪن ۾،
تند وڄائي پنھنجي تن ۾،
اوريان ڪيئن آواز پرين جو!

ھوٿيءَ ھيڪر حق سڃاتو،
پنھنجو تر ۽ تڪ سڃاتو،
لاکي لاھي لڪ سڃاتو،
احمد آ آغاز پرين جو!

محمد، حسن ٻئي گڏ آھن،
حيدر مرمت جو سڏ آھن،
پنجتن وڏڙن جو وڏ آھن،
عجز، انڪ ۽ آز پرين جو!
رم جهم رم جهم راز پرين جو،
ناچ وندر آ ناز پرين جو!