نہ انتظار يار، نہ ڪو الڪو بھار جو،
ڪيف ئي رھيو نہ آھي ندوريءَ ڄمار جو.

ڏينھن رات جا چڪر! اسان تي بہ قرب ڪر،
ڪڏھن چورائي آڻ تہ ڪو پل قرار جو.

هئي زندگي ڪٽجڻي، سا ڪٽجندي وئي،
ڪو ساھ اڌار جو، ڪو گراه اڌار جو.

دودن جي دلين تي هئا، اندوه ڪي ٻيا،
نہ تنھنجو ڀئہ چنيسر! نہ تنهنجي ڪٽار جو.

مُنڊيءَ ۾ پئي جڙاءُ جيئن، جڳ مڳ ٿي جوت ڏئي،
اھڙو ئي ڏيک سپني ۾ آ، تنهنجيءَ بہ سار جو.

گڏ ھئين تہ نہ ڪڇئين، اکيون جهڪيون رکيئي،
ڪارڻ ھو ڪھڙو، موڙ تي پوئتي نھار جو.