ھلو ديس جا ڀرجهلا ٿي ھلو،
ھلو ڪاروان قافلا ٿي ھلو،

ھلو دشمنن لئہ ڪا للڪار ٿيو،
ھلو ڪي تہ اڄ ٿرٿلا ٿي ھلو،

وطن جي مٽي ٿي سڏي پاڻ کي،
ٻَڌي سِر ڪفن دادلا ٿي ھلو،

ھلو اڄ وطن وارثي ڪا ڪيو،
وڏي دل وڏا حوصلا ٿي ھلو،

ھو ڏاھر ۽ دودا سڏن ٿا پيا،
ھلو تن جا اڄ لاڏلا ٿي ھلو،

ھلو جنگ جوٽڻ ڪا تاريخ جي،
ھلو عشق جا مرحلا ٿي ھلو،

مُنھن جي مٽي جو رکو ڪو ڀرم،
ھلو سنڌ جا سلسلا ٿي ھلو،

ھلو ڪاڪ جي ماڪ ٿي وسَو،
ھلو ووڪَ ۽ ولولا ٿي ھلو،

وڄي ٿو طَبلُ جنگ جو اڄ وري،
هَلو اڄ تہ ڪي زلزلا ٿي ھلو.