اسان کان اسان کي وڃائي ڇڏيو آ،
حياتي حِصن ۾ ورهائي ڇڏيو آ،

اکين ۾ اسانجي وهن ٿيون نديون ڪي،
سمونڊن ۾ سينو سمائي ڇڏيو آ،

اسان تيز آنڌي ۾ ڄڻ ديپَ ها سين،
هَوا زندگيءَ جي اُجهائي ڇڏيو آ،

گذاريون حياتي وٺي نانءُ هُن جو،
زھر ۾ ڪو زم، زم ملائي ڇڏيو آ،

اسان ئي تہ آهيون، ازل ۽ ابد سڀ،
خُدا پاڻ پردو ھٽائي ڇڏيو آ،

صليبن تي عيسي بڻي ڄڻ چڙهيا سين،
اسان جهوڪ ۾ سر ڪٽائي ڇڏيو آ،

بقا ڪا جھان کي ڏنيون ٿا وڃون اڄ،
اسان ارتقا کي اڏائي ڇڏيو آ،

کُٽي جام ان کان اڳي ڪو اچوڙي،
متارن کي موکي چَوائي ڇڏيو آ،

ڪيو وقت کي اڄ اسان مُنجمد آ،
اسان لامڪان کي چِڙائي ڇڏيو آ،

سڄي موج مستي جا خالق اسان ئي،
نشن کي نشو ڪو چڙھائي ڇڏيو آ،

اسان ۽ اوهان جا ختم فاصلا ٿيا،
ڪو تعويذ اھڙو مڙهائي ڇڏيو آ،

ڪفر جو نہ حملو ڪري ڪوبہ ڪافر،
حُسن پاڪ ڪلمو پڙھائي ڇڏيو آ،