آئون تو ساڻ، تون ڪٿي جانان!
ھن گهڙي ھاڻ، تون ڪٿي جانان!

زندگي زلزلي ۾ ڦٿڪي پئي،
ڪيڏي ڇڪتاڻ! تون ڪٿي جانان!

ٿي سگھي جي تہ مونکي ميڙي وٺ،
زندگي واڻ، تون ڪٿي جانان!

آئون تو منجهہ مئو پيو آھيان،
پاڻ تون پاڻ، تون ڪٿي جانان!

چپ منھنجا نہ سُڪن پيا ساگر تي،
اک آلاڻ، تون ڪٿي جانان!

ڪھڙي ڪُنڊ ڪائنات جي وڃي ورتئي؟
پاڻ کي آڻ، تون ڪٿي جانان!

ڪنھن گهڙيءَ منجهہ تون گُھمين پيئي،
ڪو سفر ساڻ، تون ڪٿي جانان!

آئون رِڻ ۾ رَڙي سڙي ويندس،
مان ٿيس پاڻ، تون ڪٿي جانان!

منھنجي سيني ۾ تنھنجي سھڪي جو،
آ لڳل ٻاڻ، تون ڪٿي جانان!

جسم تنھنجي، جي گونجندڙ گرمي،
ڪيڏي ڪوساڻ! تون ڪٿي جانان!