مُھاڻي جيئن جواني ۾
ندي ائين آرکيڻن ۾
ندي جا نيڻ جَل ٿل ھا
نديءَ کي نِير نيڻن ۾
نديءَ کي ڀاڪرن ۾ ھئي
جواني ميربحرن جي
نديءَ کي چيلھہ تي آيا
سدا ھو وار سھڻيءَ جا
نديءَ کي نينگرين ھوڏيو
نديءَ ڪِيا آر جوڀن جا
نديءَ وٽ پار جوڀن جا
نديءَ وٽ چيلھہ سنهڙي ۽
نديءَ وٽ موڪريون ڇاتيون
نديءَ کي آرسون موڙي
جواني ڄڻ تہ وئي ٻوڙي!
ندي بي انت ھوندي ھئي
ندي ھئي ماڃري ڇوري
نديءَ وٽ سنگ آنڀُو ھئا
نديءَ وٽ لاڙ سارين سان
نديءَ وٽ لال لاھياريون
نديءَ کي ڇَڄ ۾ ڇڙيئون
نديءَ تي مست ھئا ڇورا
نديءَ کي سينڍ ۾ ڳايئون
وڄايئون وانسلي ۾ پَئي
نديءَ کي خواب ايندا ھئا
نديءَ سان ٽنڊ مھاڻي جي
نديءَ ھي لوڏ چورائي
نديءَ وٽ ننڊ مھاڻي جي
نديءَ جو سمنڊ نيري سان
سدا ھو سڪ جو ناتو
نديءَ کي ڀر تي بيھي
مھاڻي واھہ جو ڳاتو
ندي ھئي ماءُ جيجل جيئن
ندي انصاف سان ڪيڏو
ورھاڻي وانگين ۾ پئي!
نديءَ وٽ ڪنوار لاڏا ھئا
ندي پئي آرتي لاٿي
ندي ھئي ٻارڙي وانگي
نديءَ لئہ پينگھہ بتيلو
نديءَ ھئي حيدري ميلو
ندي ھئي ميٺ ميلاپو
وڇوڙو ڀر ڏيئي گذريس
ندي ٿي نيٺ نيئاپو
ٻکيل ھئي ٻانھڙين ۾ ڄڻ
ندي سان مير مھاڻن کي
ڪڏھن جا ڪاڪلن ۾ ٿي
سُتي ٿي ننڊ ٻيڙين ۾
ھينئر سا بند ٻيڙين ۾
مسافر قيد ٿي ويئي
مسافر قيد ٿي ويئي