روپا جا فانوس برن ٿا
ڀونگر جي وَڏ ڪونئر نياڻي
ٻانِھين سان گڏ ٽھڪ ڏئي ٿي
ڌرتي ھڪڙو خواب ڏسي ٿي!

ساڳيا جاڳ چنيسر سان ھن
ليلان جو ليھور وسي ٿو
ڪونئرو ھار پِروئي ويٺي
ڌرتي ھڪڙو خواب ڏسي ٿي!

ناتر جا ٽڪساٽ ٽٽن ٿا
چانگو ھل چَندن جا کائي
مومل وھنجي وار ڇنڊي ٿي
ڌرتي ھڪڙو خواب ڏسي ٿي!

دُور نديءَ جي ھُن ڀر ويھي
ويراڳڻ ميھار وڄائي
سھڻي ترندي پار وڃي ٿي
ڌرتي ھڪڙو خواب ڏسي ٿي!

نوري وار ھٽائي مُرڪي
ڄام تماچي مُشڪي بيٺو
ڪينجهر ٿڌڙو ساھہ ڀري ٿي
ڌرتي ھڪڙو خواب ڏسي ٿي!

آئون ڏاندن گاڏي جوٽي
موھن بازار وڃان ٿو
ساري وستي سک وسي ٿي
ڌرتي ھڪڙو خواب ڏسي ٿي!

درياہ جي ڀر منھنجو نُھٽو
ساڳيا اوج اُڍي جا آھن
ھوٿل موتين ٿال ڀري ٿي
ڌرتي ھڪڙو خواب ڏسي ٿي!

گهوڙن کي وھنجاري ھاڻي
ڄام نندو درٻار وڃي ٿو
راڻي سر تي تاج رکي ٿي
ڌرتي ھڪڙو خواب ڏسي ٿي!