ڪَتيون ڪئين قيد ۾ گُذريون، چڱو چيٽن ۾ ملنداسون،
سرنھن پيلا جھلندي گُل، تڏھن کيتن ۾ ملنداسون.

اُتر جا واءُ جڏھن ورندا، اڇا سر، ڪانھہ سنگ ڪڍندا،
لھنديون ڪُونجون جَتي ڪُڻڪي انھن ڪِيٽن ۾ ملنداسون.

ڇڏي درياءُ ويندو دھشت، بنائي ٻيٽ ٻيلاٽيون،
چڙھي تڏھن ناءُ ننڍڙي تي، انھن ٻيٽن ۾ ملنداسون.

جڏھن آزاديءَ جهنڊا، پيا جهر جهنگ جھوليندا،
ڌڻي ڀونءِ ڀيٽ پيا چڙھندا، اُنھن ڀيٽن ۾ ملنداسون.

پرين جي پيار پنھنجي تي، لڳا پھرن مٿان پَھرا،
تہ لنگھہ لانگها جهلي ”منشي“ پيا اک ٽيٽن ۾ ملنداسون.