ڌرتي - دين - ڌرم
ڌرتي دين ڌرم، ڌرتي دين ڌرم،
ڌرتي ڪعبو، ڌرتي ڪاشي، ڌرتي ديرو حرم،
ڌرتي دين ڌرم

دين ڌرم سڀ ڌرتي ڄايا، ڌرتي آھي اتم،
انسانن جي آجائيءَ جو، آھي ڀونءَ ڀرم،
ڌرتي دين ڌرم

سنڌ ڌرتيءَ ڏانھن ميري من کي، ڀاڳيا ڪن ڀسم،
کاھڙ ساري کنھان کوندا، کن نہ ڪن سي کم،
ڌرتي دين ڌرم

ڀريا تريا درياھ ھن ۾، بڻيل باغ ارم،
ٿڌڙيون ٿڌڙيون ھيرون جنھن جون، شام وسي شبنم،
ڌرتي دين ڌرم

شاھ، بلاول، دودا، ھوشو، ڌرتي ڄايا ڄم،
سوڳنڌ ساٿ سچو سنڌوءَ سان، ڪوڙو ڪن نہ قسم،
ڌرتي دين ڌرم

ھن ڌرتيءَ جي ھر بانڪي جا، بازو آھن پم،
رڪ پگهاري راڻن ڇڏيا، گڙي ٿيا جي گرم،
ڌرتي دين ڌرم

مٽيءَ سان آ محنت جائز، شرعاً ڪھڙو شرم،
سنڌو ديش لئہ تيسين وڙھبو، جيسين دم ۾ دم،
ڌرتي دين ڌرم

مارئي مچايا ملڪ مٽيءَ لئہ، ماڙين ۾ ماتم،
ڌوراڻن کي ڌوڙ وجهي ھن، ڳايا ڳاڱيون ڳم،
ڌرتي دين ڌرم

واھڻ واھڻ واھڙ واھي، ڪري ترايون تم،
سنڌ درياھ جو ٻنهي ڪنڌين سان، سھڻو آھي سنگم،
ڌرتي دين ڌرم

”منشي“ مھڪون سنڌ مٽيءَ جون، اٿليون عرب و عجم،
ھن جون ھاڪون ھن جون ڌاڪون، پھتيون پورب پڇم،
ڌرتي دين ڌرم