هُو ڪير ھو
جنھن جي ھٿن ۾ ھر وقت
قلم ۽ ڪتاب ھوندو ھو
قلم جنھن ۾
سنڌ هوءَ جو جَل ھوندو ھو
ڪتاب جنھن ۾
امنِ انسانيت، ترقيءِ بني آدم
آزادي ۽ آسُودگيءَ جو درياھ
تارئُون تار وھندو ھو

هُو ڪير ھو
جنھن جي اکين ۾
اوجاڳن جو انت آيو ھو ۽
خوابن جو فصل پچڻ کان پوءِ
ساڀيائن جِي سرحد طرف
نڪري چڪو ھو

هُو ڪير ھو
جنھن جي منَ ۾
محبت جو ملڪ مُرڪندي
مُکَ مُکَ تي مُرڪ جو ٻِج ڇٽيندي
وکَ وکَ تي وڻ پوکيندو ھو

هُو ڪير ھو
جنھن جُون ٻانھون
وطن جا ساوا وڻَ هونديون ھيون
جن جي ڇانوَ ۾ پکي
پسار ڪندا هئا ۽
ماءُ جھڙي ٻاجهہ
سندن ٻکين پوندي هئي

ھو ڪير ھو
جنھن جي ڳلي مان ھر وقت
پوريءَ قوم جي ڳڻتيءَ جو ڳيچ
ٻُڌڻ ۾ ٿي آيو
ھو اھو شخص ھو
جيڪو وطن جو نقشو ھو ۽
جنھن جي ھئڻ سان
پنھنجي ھجڻ جو احساس ھو.