تون ستارن جي جڙوات، رھنما تنھنجون اکيون،
تون ئي طاقت ۽ حرارت، رھنما تنھنجون اکيون.

خون جي ھر بوند جو بدلو وٺڻ جو آ عزم،
وقت آ اعلى عدالت، رھنما تنھنجون اکيون.

ھاڻ ماڻهو پاڻ پنھنجا معجزا ڏيکاريندا،
قوم جي پنھنجي ڪرامت، رھنما تنھنجون اکيون.

لفظ تنھنجا ھاڻ ھيڻن لاءِ بڻبا طاقتون،
قلم تنھنجو ۽ ڪتابت، رھنما تنھنجون اکيون.

علم ۽ ادارڪ سان غدار سڀ سوڙها ڪبا،
چوڪ تي جلندي جھالت، رھنما تنھجون اکيون.

بينظيرن ۽ فقيرن جا فڪر ۽ فلسفا،
جاڳندي رھندي امامت، رھنما تنھنجون اکيون.

ڪونج تنھنجي گونج پئي ڪُڻڪي دلين ۽ ديس ۾،
تون ئي صدقي جي صداقت، رھنما تنھجون اکيون.

ھر ڳليءَ ۽ چوڪ تي آھي عوامي ڪٽھڙو،
سنڌ ۾ ٿيندي سماعت، رھنما تنھنجون اکيون.