ناسي پَکيءَ جو پَرُ ۽ نيرو هَوا جو رنگُ،
اُجرو وَهي پيو جَرُ ۽ نيرو هَوا جو رنگُ.

مون ۾ پيو اڃان ڀي ھڪڙي صديءَ کان کَڙڪي،
ھڪڙو پُراڻو دَرُ ۽ نيرو هَوا جو رنگُ.

جنھن طرف ھو شڪاري بندوقَ ساڻُ بيٺو،
تنھن طرف ھو وَڳرُ ۽ نيرو هَوا جو رنگُ.

ھڪڙو پھاڙُ جنھن جي چوٽيءَ تي چنڊُ چَمڪي،
ڳاڙهو سندس پَٿرُ ۽ نيرو هَوا جو رنگُ.

جهنگلي وَڻن جي ويجهو هڪُ نانگُ ھو لڪل،
هاريءَ ڏٺو پئي هَرُ ۽ نيرو هَوا جو رنگُ.

تصوير ۾ ليئو مون پائي ڏٺو ھو جنھن کي،
ننڍپڻ سندو شھر ۽ نيرو هَوا جو رنگُ.

نِيرين رڳن مان وھندو نِيرو ڪري ويو ھو،
نيرو هُيو زهرُ ۽ نيرو هَوا جو رنگُ.