ملي وينگس هئي واسينگ وارن سان شڪاگو ۾
الائي ڇا چئيِ ويئي اشارن سان شڪاگو ۾

ٽڪن سان گَجُ پهريل سانوري جو سامهون آئي
لٿي ڄڻ شام، ويسٽ - ان تي ستارن سان شڪاگو ۾

مليا جي آمريڪا ۾ کُليل دل سان مليا سنڌي
ڪيائون وَڙ سوَڙ ”امداد“ پارن سان شڪاگو ۾

پسان ٿو آءُ ان ۾ اولڙو ھڪ چنڊ چھري جو
ندي ٿي تار وھندي وئي ڪنارن سان شڪاگو ۾

پراڻي مَڌُ وانگي ئي نشا تن جا لٿا ناهن
گذاريوسين گهڙيون جيڪي بہ يارن سان شڪاگو ۾

چيوسين ها چيوسين ڳر لڳي جيڪي بہ چوڻو ھو
ڪيوسين سَو دلين سان پيار پيارن سان شڪاگو ۾

الائي پُور ڪھڙي ۾ ”سحر“ سرٻاٽيو: سانول!
هجون ها ڪاش تون ۽ آءٌ ٻارن سان شڪاگو ۾“

” صنم “ ڳائي رھي هئي شاھ جي اسٽيج تي وائي
ڀِٽائي ساڻ ھو ڄڻ بيقرارن سان شڪاگو ۾