ڇڏ وانڌا ويندين راتين جا،
ٿيا پار چٽا پرڀاتين جا.

ٿيون ڀٽڪن ڀوري بادل سان،
ڏس آرا اکڙين آتين جا.

تون آگم آگم بڻجي آءَ،
جيئن ڀير ڦرن برساتن جا.

مون تاتيو تور آ تاڙن جو،
ڪي ڇوڏا چاري ڇاتين جا.

مون ڪنڌ تنين جي ڪاڻ ڏنو،
جن ڪنڌ جهڪايا ڪاتين جا.

ور موٽ او ڳيرا! ڏينھن وريا،
سي لوهيڙي تي لاتين جا.

تون ڪٿ ڪٿ تن کي سڏ ڪندين،
ھو راھي راھ اڄاتين جا.

تون ڳاءُ تہ پوءِ ڪيئن منڊجن ٿا،
ها! وات سڀن چؤواتين جا.

ھڪ وار تہ خنجر چمڪڻ ڏي،
پيا کلندا ڀيد حياتين جا.