وڄائي حق جو نگارو ساٿي
ڪُپت جي صحبت قبول ڪونھي

اسان تہ باغي بغاوتن ۾
ڪتئي ڪا ظلمت قبول ڪونھي

ڪُساڻا اڄ ڀي ڪيئي گهوٽ ڪونڌر
ڪُساڻيون اڄ ڀي لکين ڪنواريون

ھي لال ڳاڙها جوان لاشا
ڪُهاڙين سان ٽُڪين پُڪارو

ھي ڪوڙي مُڙسي ھي ڪوڙا ماڻهون
ھي ڪوڙي غيرت، قبول ڪونھي

گُلاب ميڙي کڻي وٺو سڀ،
اسان جون دل لڳيون ٿوهرن سان

اسان جي چاهت چڪور چيتا،
اسان جي سنگت نہ بيوڙن سان

ھي محل ماڙيون، ھي مال ملڪيت
ھي شان شوڪت قبول ڪونھي،

اي سنڌ جا دادلا پُٽ، اُٿو تہ جيجل جي ٿڃ ملهايون
ھي ننڊ نيباھ ھجي ٻين کي، آ مير ڪلوئي سِر ڪٽايون

اڏار جن پيون ھي پاڪ پوتيون،
اھا خيانت قبول ڪونھي.