تون جي ايندين رات، الا او رات،
تہ منھنجي رات اَمر ٿي ويندي.!

تون جي ايندين ميت، تہ ھي سنگيت اَمر ٿي ويندي،
مون ٻاري جا جوت، انھيءَ جي جيت اَمر ٿي ويندي؛
پر جي کاڌم مات،الا او مات،
تہ منھنجي ماتِ اَمر ٿي ويندي.!

تون جي ايندين ڍول، تہ ٻَھ ٻَھ ٻُرندا منھنجا ٻول،
جھرَ جھرَ جَرڪي پوندا جن ۾ منھنجا روح رتول:
وائي آئي وات، الا او وات،
تہ منھنجي لاتِ اَمر ٿي ويندي.!

تن من تنھنجي ڀيٽ، نڇاور توتي منھنجا راڳ،
مان آھيان تنھنجي آھوتي، تون آن منھنجي آڳ؛
توکي ڏسندي ڏات، الا او ڏات،
تہ منھنجي ڏات اَمر ٿي ويندي.!

تون جي ايندين رات، الا او رات،
تہ منھنجي رات اَمر ٿي ويندي.!